Қазақстанда 1 млн-нан астам бизнесмен бар. Олардың барлығы дерлік орташа жалақыдан төмен табыс табады.

Статистика бюросы 2021 жылғы халық санағының қорытындысы бойынша халықтың кірісі туралы мәліметтерді жариялады. Сондай-ақ қазақстандықтардың күнкөріс көзін қайдан алатыны туралы да мәліметтер бар.

Елде шамамен 1 млн 75 мың адам, яғни халықтың 5,6%-ы өз кәсібімен күн көретіні белгілі болды.

Кәсіпкерлердің бестен бір бөлігі Алматы қаласы мен Алматы облысында тұрады.

Жалпы кәсіпкерлердің 53%-ы ерлер, 47%-ы әйелдер.

Бизнесменнің бәрін бай деп ойласаңыз, қателесесіз. Кәсіпкерлердің 81%-ның айлық табысы 250 мың теңгеден аспайды. Ал елдегі орташа жалақы 2021 жылы 275,6 мың теңге болған.

Кәсіпкерлердің 0,08%-ы айына 1 млн-нан көп табады. Ал жалақысы 1 млн теңгеден асатын қызметкерлердің үлесі 0,09%. Яғни, кәсіпкерден гөрі жалдамалы жұмысшы болып 1 млн теңгеден көп жалақы алу ықтималдығы жоғары.

Естеріңізге сала кетейік, таяуда Қазақстанда неше адамның 1 млн теңгеден көп жалақы алатынын жариялаған едік.