«Қазақстан Халық Банкі» акционерлік қоғамы 2025 жылғы 30 қыркүйекте аяқталған тоғыз айдың қаржылық нәтижелерін жариялады.
2025 жылдың 9 айында қарапайым акционерлерге тиесілі таза пайда 2024 жылдың осындай кезеңімен салыстырғанда 26,8% өсіп, 809,9 млрд теңгеге жетті. Бұл несиелеудің, транзакциялық және сақтандыру бизнесінің ұлғаюына, сондай-ақ 2024 жылы депозиттің мерзімінен бұрын өтелуіне байланысты біржолғы шығынның базалық әсеріне байланысты.
Банк көрсеткіштері: таза пайыздық маржа — 7,2% (өткен жылдың 9 айында — 7,1%); несие портфелі қаңтардан бері 8,3% өсіп, 12,4 трлн теңгеге жетті; депозиттер қаңтардан бері 9% өсіп, 14,1 трлн теңге болды, оның ішінде: 7,7 трлн теңге — жеке тұлғалар депозиттері (+7,2%); 6,4 трлн теңге — заңды тұлғалар депозиттері (+11,3%).
2025 жылдың 30 қыркүйегіндегі есепке сәйкес, Halyk Bank жалпы активтері 20,4 трлн теңгеге жетіп, жыл басынан бері 10% өсті. Клиенттерге берілген займдар көлемі 13,0 трлн теңгеге жетіп, 8,2% артты.
Банк 2025 жылдың тоғыз айында проценттік кірістерін 26,4%, ал проценттік шығындарын 30,5% көбейтті. Проценттік табыстың артуы клиенттік несиелердің орташа көлемінің өсуімен байланысты. Проценттік шығындардың өсуіне клиенттердің қаражаты бойынша орташа мөлшерлеменің және теңгедегі портфель үлесінің артуы әсер етті.
Клиент қаражаттары бойынша мөлшерлемелердің өсуіне қарамастан, активтердің құрылымындағы проценттік кіріс әкелетін активтердің үлесі артқандықтан, NIM 7,1%-дан 7,2%-ға көтерілді.
Комиссиялық табыс 2025 жылдың 9 айында 10% өсім көрсетті. Бұған заңды тұлғалар тарапынан транзакциялық табыстың артуы, кепілдіктер мен аккредитивтер бойынша комиссиялардың өсуі ықпал етті. Жеке тұлғалардың транзакциялық табысы адалдық бағдарламасы бонус көлемінің артуына байланысты аздап төмендеді.
Операциялық шығындар 2025 жылдың 9 айында 22,5% артты. Бұған еңбекақы мен сыйақылардың индексациясы, ұзақ мерзімді ынталандыру бағдарламасы және ІТ инфрақұрылымды дамытуға арналған шығындар әсер етті.
Операциялық шығындардың операциялық табысқа қатынасы 2024 жылғы 17,6%-дан төмендеп, 16,9% болды. Бұл биылғы жоғары операциялық табыспен түсіндіріледі.
Клиенттерге берілген несиелер бойынша тәуекел құны 1,4% деңгейінде болды — бұл банк болжамына сәйкес қалыпты деңгей.