ADCB Қазақстанда әмбебап банк ашуды жоспарлап отыр, деп хабарлады Қаржы нарығын реттеу және дамыту агенттігі басшысы Мәдина Әбілқасымова. Оның айтуынша, бұл жаңа қаржы ұйымы бола ма, әлде ADCB-нің Қазақстандағы еншілес банкі, бұрынғы Al Hilal-тың стратегиясы өзгере ме, әлі белгісіз. Жақында ол бөлшек сауда сегментінен бас тартты және ребрендинг жасады.
«Қазір біз заңға дәстүрлі әмбебап банк қызметтерін де, исламдық қаржылық қызметтерді де бір лицензия бойынша көрсетуге мүмкіндік беретін өзгерістер енгізіп жатырмыз. Біз бұл өзгерістерді қабылдағаннан кейін ADCB әмбебап қызметтерді көрсетуге рұқсат алу үшін өтініш беруді жоспарлап отыр», — деді Әбілқасымова.
Ол сондай-ақ Қытай, Шығыс Еуропа және Грузия инвесторларының Қазақстан нарығына қызығушылық танытқанын хабарлады:
«Жақында біз Венгрияға барамыз, онда Орталық Азия аймағындағы қатысуын ұлғайтуды қарастыратын екі ірі банк бар, біз олармен осы мәселені талқылаймыз. Біз реттеуші арбитражды алып тастап, банктің еншілес ұйымдарын да, олардың филиалдарын да ашу үшін азды-көпті тең жағдайлар жасаймыз. Бас компанияның активтеріне қойылатын талаптар 20 млрд доллардан 10 млрд долларға дейін төмендейді, сонымен қатар біз филиалдар үшін рұқсат етілген қызмет түрлерін кеңейтеміз», — дейді.
Қазан айында Мәжіліс осы және басқа да түзетулерді бірінші оқылымда қабылдады.