Қаржы министрі Мәди Тәкиев салық салу базасын кеңейту және ірі салық төлеушілерді бақылау арқылы бюджет кірісі ұлғайтылатынын айтты.

Үкіметтің кеңейтілген отырысында Премьер-Министр Олжас Бектенов Қаржы министрлігінің басшысынан ведомство бюджет кірісін арттыру үшін не істейтінін сұрады.

«Біріншіден, биыл Мемлекеттік кірістер комитетіне валюталық бақылау бойынша жаңа функция ұсынылды. Сондай-ақ, жаңартылған трансферттік бағалар туралы заң шеңберінде және жаңа функцияға сәйкес біз ірі салық төлеушілерді басқаруды күшейтеміз. Екіншіден, біз де цифрландыру арқылы салық базасын кеңейтеміз. Ең маңызды басымдық – салық тәртібін арттыру», – деп жауап берді Мәди Тәкиев.

2023 жылдың қорытындысы бойынша мемлекеттік бюджеттің шығыны 26,8 трлн теңгені, кірісі 24,9 трлн теңгені құрады. Бұл айырмашылық бір жылдағы бюджет тапшылығының 30% артуына әкелді, деп хабарлайды ҚР Қаржы министрлігі.

Мемлекеттік бюджет кірісі өткен жылмен салыстырғанда 23,1% өсті. 24,9 трлн теңгенің төрттен үш бөлігі салық түсімінен (18,9 трлн теңге) түскен. Бұл негізінен КТС (5 трлн теңге) және ҚҚС (5,7 трлн теңге). Ұлттық қордан түскен трансферттердің үлесі 16%-ды (4 трлн теңге) құрады.