«Қазақстан темір жолы» ҰК» АҚ қазіргі уақытта компанияның номиналды қарызы 2,9 трлн теңгені құрайтынын хабарлады, оның 30 пайызы шетел валютасында, деп хабарлайды Rail-news.kz. Естеріңізге сала кетейік, Жоғарғы аудит палатасының төрағасы Әлихан Смайылов ұлттық компанияның қаржылық жағдайы мен қызметін сынаған еді.

ҚТЖ өндірістік және қаржылық көрсеткіштерінің жыл сайын жақсарып келе жатқанын атап өтті. Үш жыл ішінде компанияның кірісі 2021 жылғы 1,3 трлн теңгеден 2023 жылы 2 трлн теңгеге дейін көтеріліп, тұрақты динамика көрсетті. 2023 жылдың қорытындысы бойынша пайда 134 млрд теңгені құрады, бұл 2022 жылмен салыстырғанда төрт есеге көп. Бұл ҚТЖ-ның соңғы 10 жылдағы ең жақсы көрсеткіші. Бұл ретте кәсіпорын барлық несиелік міндеттемелерін уақытында өтейді.

«ҚТЖ-ның тұрақты қаржылық жағдайы халықаралық рейтингтік агенттіктердің кредиттік рейтингтерінің деңгейімен және Компанияға несиелік мүмкіндіктер мен кепілдіктер беретін халықаралық қаржы институттарының сенімімен де расталады (Moody's Investors Service – несие рейтингі «Baa3», «Тұрақты» болжамы "; FitchRatings - несие рейтингі "BBB" -", болжамы "Тұрақты"; S&P - несие рейтингі "BB", болжамы "Тұрақты"; Moody's ESG Solutions - ESG рейтингі - A2, 57 балл), - деп хабарлады компания.

Сондай-ақ компания үкіметпен және «Самұрық-Қазына» Ұлттық әл-ауқат қорымен бірлесе отырып, қазіргі уақытта қарыз деңгейін төмендету және инфрақұрылым мен жылжымалы құрамға инвестицияның жеткілікті деңгейін қамтамасыз ету үшін реттелетін тарифтерді кезең-кезеңімен арттыру және транзиттік кірістерді арттыру бойынша жұмыс жүргізіп жатқаны хабарланды.