MŪNAI криминалды драмасының авторлары сериалдың екінші маусымының түсіріліп жатқанын жариялады. Алғашқы маусым 2025 жылы жарық көріп, көрермендерді 90-жылдардағы Қазақстанға үлкен өзгерістер, жаңа мүмкіндіктер мен қатал заңдар дәуіріне жетеледі. Оқиға желісі мұнайлы өңірде өрбиді. Ақша, ықпал және билік үшін күрес аясында кейіпкерлердің тағдырлары тоғысып, тартысқа толы оқиғаға ұласады.
Алғашқы маусымның режиссері - Дархан Төлегенов. Басты рөлдерді Данияр Алшынов, Нышанбек Жұбанаев, Айбар Салы және Ақнұр Рахат сомдады. Аталған жоба шебер актерлердің басын қосып, еліміздің заманауи тарихындағы ең аласапыран кезеңнің шынайы рухын жеткізе білді.
Екінші маусымда көрермендерді жаңа кейіпкерлермен қатар, алғашқы маусымнан бері таныс кейіпкерлер де күтеді. Сондай-ақ басты рөлдердің бірінде халықаралық деңгейдегі жұлдыз өнер көрсетеді. Оқиға желісі бұрынғыдай Маңғыстау облысында өрбиді. Жаңа маусымның сценарийі толық бекітіліп, түсірілім тобы жақын арада жұмысқа кіріседі.
Жаңа маусымға дайындық аясында жаңа актерлерге арналған ашық кастинг ұйымдастырылады. Кастингке қатысты толық ақпарат кейінірек жарияланады.
Жаңа MŪNAI сериалы қандай болады, жобаны кімдер жүзеге асырады және алғашқы маусымдағы қай актерлер екінші маусымда қайта оралады - мұның бәрі жуырда белгілі болады.