Halyk Bank енді жылына бір емес, екі рет дивиденд төлейтін болды. Қаржы ұйымы дивидендтік саясатына өзгерістер енгізді, деп хабарлайды Қазақстан қор биржасы.

Дивидендтерді төлеу кезеңділігі туралы шешімді Halyk Bank директорлар кеңесі 20 наурызда қабылдаған, бірақ құжат 3 сәуірде биржада жарияланған. Сонымен қатар, дивидендтік саясатта директорлар кеңесі банк акционерлерінің жылдық жалпы жиналысына акционерлердің жалпы жиналысының шешімін ескере отырып, дивидендтер төлеу туралы шешім қабылдауды ұсынады деген тармақ енгізілген.

Halyk Bank дивидендтік саясатының тиімділігін бағалауды енгізуде. Ол дивидендтер төлеу коэффициентін және бір акцияға шаққандағы дивиденд мөлшерін, сондай-ақ төленген дивидендтердің негізгі көрсеткіштерінің тарихи динамикасын пайдалана отырып жүзеге асырылады.

«Акционерлер алдындағы дивидендтерді төлемеу үшін жауапкершілік» тарауынан 22-тармақ алынып тасталды, оған сәйкес банкке байланысты емес себептер бойынша жарияланған дивидендтер акционерлерге төленбесе (талап етілмеген дивидендтер), қаржы институты оларды төлейді. Қазақстан Республикасының заңнамасында белгіленген тәртіппен жүзеге асырылады. Талап етілмеген дивидендтер бойынша сыйақы есептелмейді. 

Дивидендтерді төлеу үшін банк кемі 17% деңгейде дивидендтерді төлеудің жоспарланғанын ескере отырып, негізгі капиталдың жеткіліктілігінің болжамды көрсеткішін орындауы керек. Банк жыл сайын жай акциялар бойынша дивидендтерге өткен күнтізбелік жылдағы аудиттелген шоғырландырылған қаржылық есептіліктен анықталған жалпы таза кірістің 50%-дан 100%-ға дейінгі бөлігін бөледі. Төлемдерді қамтамасыз ету үшін банк өзінің еншілес ұйымдарынан алатын дивидендтерден де ақша тартады. Бұл ретте директорлар кеңесі жай акциялар бойынша дивидендтерді төлемеу немесе олардың жалпы сомасын жалпы таза кірістің 50%-нан төмен азайтуды ұсына алады.

2023 жылы банк 2022 жылдың 553,7 млрд теңге таза пайдасының 50%-ын немесе 276,5 млрд теңге дивиденд төледі. 2022 жылы 138,3 млрд теңге төленді, ол кезде таза пайда 462,3 млрд теңге болған, яғни таза пайданың 30%-ын төлеген. 

Былтыр банк таза табысын 21,8% ұлғайтып, 693,4 млрд теңгеге жеткізді.Төртінші тоқсанда пайда 156,1 млрд теңгені құрады, бұл бір жыл бұрынғыдан 1,6% аз.