Биылғы жылдың екінші тоқсанында ҚР-да үй шаруашылықтарының ақшалай шығындары орта есеппен 774,9 мың теңгеге жетті, бұл 2021 жылдың сәйкес кезеңімен салыстырғанда 14,5% артық. Салыстыру үшін: үй шаруашылықтарының кірісі бір жылда 16,4% өсіп, 2022 жылдың екінші тоқсанында 819,4 мың теңгені құрады, finprom.kz.

Бір жыл ішінде бір үй шаруашылығына шаққандағы шығындар мен кірістердің ара қатынасы 96,1%-дан 94,6%-ға төмендеді. Бір жылдағы ақшалай көріністегі кірістер мен шығындар арасындағы айырмашылық 27,1 мың теңгеден 44,5 мың теңгеге дейін өсті.

Өңірлер бойынша ең аз шығын Қостанай (бір үй шаруашылығында орташа 559,2 мың теңге) және Абай (573,6 мың теңге) облыстарында, сондай-ақ Шымкент қаласында (598,6 мың теңге) белгіленді. Бұл ретте, Қостанай және Абай облыстарында шығындар кірістердің сәйкесінше 76,5% және 74,9% ғана құраса, Шымкентте бұл көрсеткіш шамамен бірдей (қатынас 99,8%).

Ең көп шығын Алматы (932,4 мың теңге), сондай-ақ Қызылорда (924,8 мың теңге) және Ұлытау (912,7 мың теңге) облыстарының шаруашылықтарына түсті.

ҚР-ның үш өңірінде үй шаруашылығының шығындары кірістерден асып түсті: Алматы қаласында (10,6%-ға), Жетісу облысында (9,9%-ға) және Түркістан облысында (5,4%-ға).

Халықтың ақшалай шығындарының құрылымында тұтынушылық шығындар басым: 2022 жылдың екінші тоқсанында ол 713,9 мың теңгені құрады, бұл 2021 жылдың сәйкес кезеңімен салыстырғанда 13,8% артық. Соның 398,5 мың теңгесі азық-түлік тауарларына, 182,2 мың теңгесі азық-түлік емес тауарларға, 133,2 мың теңгесі ақылы қызметтерге тиесілі. 2021 жылдың екінші тоқсанымен салыстырғанда азық-түлік тауарларына шығындар бірден 10,2%, азық-түлік емес тауарларға – 17,7%, ақылы қызметтерге – 20,1%-ға өсті.

Сонымен қатар, 2022 жылдың екінші тоқсанында бір үй шаруашылығына орташа есеппен 45,3 мың теңге несиелер мен қарыздарды өтеуге, тағы 15,6 мың теңге туыстарына, жақындарына материалдық көмек көрсетуге, алимент, салық, төлемдер және басқа да төлемдерге жұмсалды.