Үкімет салық реформасын жүргізіп, бюджет кірісін арттырмаса, 2026-2027 жылдары Ұлттық қордан қосымша қаражат алу қаупі жоғары. Бұл туралы Үкімет отырысында Ұлттық банк басшысы Тимур Сүлейменов мәлімдеді.

Отырыста Қаржы министрлігі дайындаған «2025-2027 жылдарға арналған республикалық бюджет туралы» заң жобасы талқыланды. Құжат «Ашық НҚА» порталында жарияланды.

Бұл құжатқа сәйкес, 2025 жылы Ұлттық қордан республикалық бюджетке 5,25 трлн теңге түсуі тиіс – бұл 2024 жылмен салыстырғанда 1,65 трлн теңгеге көп. Нысаналы трансферттер ұлғайтылды (1,6 трлн теңгеден 3,25 трлн теңгеге дейін), оны үкімет әлеуметтік маңызы бар және стратегиялық маңызды инфрақұрылымдық жобаларды қаржыландыруға, сондай-ақ өңірлік өсу деңгейін ұстап тұруға пайдаланғысы келеді. Кепілдендірілген трансферт биылғыдай 2 трлн теңгені құрайды.

Сүлейменов 2025 жылы Ұлттық қордан «көп қаражат алу» жоспарланғанын, бірақ олар келесі жылдары трансферттер көлемінің азаюымен өтелетінін айтты.

«Сонымен бірге, кейінгі жылдары трансферттер көлемі соңғы жылдардағы тарихи көлемдерден айтарлықтай төмен болады деп күтілуде. Атап айтқанда, 2026-2027 жылдары трансферттер көлемі небәрі 2 трлн теңгені құраса, бұл жылдарға нысаналы трансферттер қарастырылмаған», — деді Сүлейменов.

Ол Ұлттық банк үкіметтің Ұлттық қордан қаражат алуды азайту жөніндегі шараларын қолдайтынын айтты. Оның айтуынша, Ұлттық қордың таза валюталық активтері 2025 жылы алынған қаражатты есепке алғанда 57,8 млрд долларға бағаланып, 2027 жылы 74 млрд долларға дейін өседі.

«Сонымен бірге, егер салық реформасы шеңберінде республикалық бюджеттің кірістерін айтарлықтай ұлғайту бойынша маңызды және жүйелі шаралар ұсынылмаса, 2026-2027 жылдары Ұлттық қордан қосымша қаражат алуды талап ету қаупі бар», — деді Сүлейменов.