«Қазатомөнеркәсіп» ҰАК» АҚ 2026 жылдың бірінші жартыжылдығындағы қаржылық нәтижелерін жариялады. Компанияның кірісі 9% өсіп, 717,8 млрд теңгеге жетті. Алайда таза пайдасы 9% төмендеп, 240,4 млрд теңгені құрады.
Компанияның түзетілген EBITDA көрсеткіші 2% өсіп, 371,3 млрд теңге болды. Ал «Қазатомөнеркәсіп» акционерлеріне тиесілі EBITDA 12% төмендеп, 264,8 млрд теңгеге түсті. Акцияға шаққандағы пайда 22% азайып, 604 теңгені құрады.
Уран бағасы көмектесті
Компанияның қаржылық нәтижесіне уран бағасының өсуі оң әсер етті. Есепті кезеңде топтың уранды орташа сату бағасы 16% өсіп, фунтына 67,88 долларға жетті.
Бұл ретте нарықтағы спот бағасы 24–25% өсіп, фунтына шамамен 86 доллар болды.
Уран өндірісі де артты. Бірінші жартыжылдықта өндіріс көлемі 9% өсіп, 13 291 тоннаға жетті. «Қазатомөнеркәсіпке» тиесілі өндіріс 10% өсіп, 7 054 тоннаны құрады.
Алайда сатылым көлемі айтарлықтай өзгермеді. Компанияның өз уранының сатылымы 13% төмендеді. Дайын уран қоры керісінше 23% өсіп, 8 245 тоннаға жетті.
Өзіндік құн күрт өсті
Компания үшін негізгі мәселелердің бірі – өндіріс шығындарының өсуі.
Уран өндірудің ақшалай өзіндік құны 37% өсіп, фунтына 24,48 долларға жетті. Ал толық өзіндік құн 25% өсіп, 38,45 долларды құрады.
«Қазатомөнеркәсіп» шығындардың өсуін бірнеше факторымен түсіндіреді. Олардың қатарында уран өндіруге салынатын салық мөлшерлемесінің 9%-дан 12,4%-ға көтерілуі, күкірт қышқылы бағасының қымбаттауы және теңгенің нығаюы бар.
Компания 2026 жылға болжамын төмендетті
Шығындардың өсуіне байланысты «Қазатомөнеркәсіп» 2026 жылға арналған бірқатар қаржылық болжамдарын қайта қарады.
Компанияның жалпы түсім бойынша болжамы 2,2–2,3 трлн теңгеден 2,1–2,2 трлн теңгеге төмендетілді.
Уран сатудан түсетін түсім болжамы да 2,075–2,175 трлн теңгеден 1,9–2 трлн теңгеге дейін қысқартылды.
Сонымен бірге өндіріс шығындары бойынша болжам жоғарылады:
ақшалай өзіндік құн — $25,50–27,00/фунт;
толық өзіндік құн — $39,00–40,50/фунт;
күрделі шығындар — 435–450 млрд теңге.
Бұған дейін компания ақшалай өзіндік құнды $23,50–25,00, толық өзіндік құнды $35,00–36,50 деңгейінде, ал күрделі шығындарды 415–430 млрд теңге көлемінде болжайтын.
Бұл ретте «Қазатомөнеркәсіп» 2026 жылғы өндіріс пен сату көлемі бойынша болжамын өзгертпеді.
Теңгенің нығаюы да әсер етті
Компанияның жаңа қаржылық болжамы доллардың 490 теңгелік бағамы негізінде жасалды. Ал бұған дейінгі болжамда доллар бағамы 540 теңге деңгейінде алынған.
Яғни теңгенің нығаюы компанияның теңгемен есептелетін қаржылық көрсеткіштеріне қысым жасап отыр. Оған өндірістік материалдар мен басқа да шығындардың қымбаттауы қосылып, 2026 жылға арналған қаржылық болжамдардың төмендеуіне себеп болды.
Осылайша, бірінші жартыжылдықта уран бағасының өсуі «Қазатомөнеркәсіп» кірісін арттырғанымен, өндіріс шығындарының жоғарылауы компанияның таза пайдасына кері әсер етті.