Halyk Finance сарапшыларының пікірінше, Отбасы банкі IPO-ға шыққан жағдайда өзінің бірқатар мемлекеттік артықшылықтарынан айырылуы мүмкін. Атап айтқанда, жаңа акционерлер банкті трансформациялауды талап ете бастауы ықтимал.

Отбасы банкінің 50 млрд теңге көлемінде бес жылдық облигациялар шығаруы аясында Halyk Finance қаржы институты үшін ықтимал тәуекелдерді бағалады. Сарапшылар елдік рейтингке тәуелділік, Байтерек холдингі тарапынан қолдаудың азаюы және Қазақстан экономикасындағы тәуекелдерден бөлек, банктің IPO арқылы акцияларын нарыққа шығаруын да қауіптердің қатарына қосты.

Талдаушылардың айтуынша, IPO өткізілген жағдайда Отбасы банкі мемлекеттік бағдарламалардағы рөлінің төмендеуі, субсидиялар мен жеңілдетілген шарттардың қысқаруы сияқты артықшылықтардан айырылуы мүмкін. Сонымен қатар, тұрғын үй құрылыс жинақтары нарығындағы монополиялық позициясын жоғалту қаупі бар.

Жекешелендіру кезінде акционерлер банктің әмбебап қаржы институтына айналуын күтуі ықтимал. Бұл қазіргі қаржылық модель мен банктің әлеуметтік миссиясына қысым түсіруі мүмкін.