Үкімет пен «Самұрық-Қазына» қоры гидроэлектр станцияларын сенімгерлік басқаруға беру мәселесін шешуі керек, деп мәлімдеді президент Қасым-Жомарт Тоқаев.

«Үкімет пен «Самұрық-Қазына» қоры гидротехникалық нысандардың тиімділігін арттыру мақсатында оларды сенімгерлік басқаруға беру мәселесін шешуге тиіс», – деді ол Қызылордада өткен Ұлттық құрылтай отырысында.

Оның айтуынша, еліміздің су ресурстары ұлттық энергетикалық жүйенің тұрақтылығын қамтамасыз ету үшін маңызды резерв саналады, алайда олардың энергетикалық әлеуеті жеткілікті деңгейде тиімді пайдаланылмай отыр.

«Ашығын айтқанда, бұл маңызды учаскедегі жұмыс қолға алынбай, қалып қойған. Еліміздің нақты гидроәлеуетіне шұғыл түрде дәл баға беру керек, өйткені кеңес дәуірінен қалған бұрынғы деректер әлдеқашан ескірген», – деді ол.

Президент Қазақстанның су-энергетикалық ресурстарының сенімді картасын дайындау қажеттігін атап өтті. Оның айтуынша, «уақыт күтпейді», сондықтан аталған құжаттарды дайындау ұлттық гидроэнергетиканы жеделдетіп дамытуға кедергі болмауға тиіс.