Еуразиялық даму банкі 2026-2028 жылдарға арналған экономикалық даму шолуын дайындады. Ұйым Қазақстандағы инфляцияның төмендеуіне қатысты жақсы болжам жасап отыр, бірақ сонымен бірге Ұлттық Банк қатаң ақша-несие саясатын жалғастырады деп есептейді.

Инфляция

Ұйымның болжамы бойынша, 2026 жылдың соңына қарай Қазақстандағы инфляция 9,7%-ға дейін баяулайды (2025 жылдың соңына болжанған 12,3% деңгейінен). Бұған Ұлттық Банк қабылдаған шаралар әсер етуге тиіс. Сондай-ақ, коммуналдық тарифтер өсімінің тоқтатылуы және кейбір өнімдердің бағасына қойылған мораторий де инфляцияны төмендетуге қосымша көмектеседі.

Еуразиялық даму банкі сарапшыларының бағалауынша, 2027 және 2028 жылдары инфляция 5,7% деңгейіне шығуы керек.

Ұлттық Банктің базалық мөлшерлемесі

Банк алдағы жылы инфляция деңгейі әлі де жоғары болып қалатындықтан, Ұлттық Банк базалық мөлшерлемені кем дегенде 2026 жылдың екінші тоқсанына дейін 18% деңгейінде ұстап тұратынын атап өтті.

«Тек инфляцияның баяулауы тұрақты сипат алғаннан кейін ғана реттеуші базалық мөлшерлемені төмендетуге көшеді деп ойлаймыз. 2026 жылдың соңына қарай мөлшерлеме шамамен 14% деңгейінде болады деп болжаймыз», – деп атап өтті Еуразиялық банк өкілдері.

ІЖӨ

Сарапшылардың пікірінше, 2026 жылы еліміздің экономикасы 5,5% деңгейінде өсуін жалғастырады. Бұған биліктің елдің инвестициялық әлеуетін ашу жөніндегі бастамалары ықпал етуге тиіс. «Бәйтерек» холдингі арқылы экономикада жыл сайын, негізінен өнеркәсіп пен агроөнеркәсіп кешенінде 100 ірі инвестициялық жоба іске қосылуы керек. Экономикалық өсімнің тағы бір факторы — инфрақұрылымдық дамудың ұлттық жоспарын жүзеге асыру болмақ.

Келесі екі жылда, яғни 2027 және 2028 жылдары да экономика 5,5% деңгейінде өсуге тиіс.