ЦентрКредит Банкінің 2025 жылғы таза пайдасы 240,2 млрд теңгені құрап, 2024 жылмен салыстырғанда 23,5% өсті. Бұл туралы қаржы ұйымының сайтында хабарланды.
Активтер көлемі 20% өсіп, 8,4 трлн теңгеге жетті. Несие портфелі 16,2% ұлғайып, 4,51 трлн теңгені құрады.
Міндеттемелер 19% артып, 7,58 трлн теңгеге жетті. Клиенттер мен банктердің қаражаты (депозиттер) 22,6% өсіп, 6,62 трлн теңгені құрады.
Капитал шамамен үштен бірге өсіп, 810 млрд теңгеге жетті. Бөлінбеген пайда 40% артып, 772,9 млрд теңгені құрады.
2025 жылғы таза табысты бөлмеу және оны өткен жылдардың бөлінбеген пайдасы шотына бағыттау туралы шешім қабылданды. Бұл туралы Миноритарлық акционерлер қауымдастығында хабарлады.
Жыл басынан бері банк акциясы 0,6% арзандаса, соңғы 12 айда 66,44% қымбаттаған. Ал толық 2025 жылы 113% қымбаттаған.
Қарапайым акциялар бойынша дивидендтер төленбейді. Банк соңғы рет дивидендтерді 90-жылдардың соңында төлеген.