Bitcoin соңғы жылдардағы ең мықты апталардың бірін көрсетті. Жеті күн ішінде алғашқы криптовалюта 24,8% қымбаттаған. Binance Research бағалауынша, мұндай ауқымдағы апталық өсім 2020 жылдан бергі ең ірі қозғалыстардың топ-1% қатарына кіреді. Сарапшылар раллидің негізгі себептерін атап, криптонарықтың тұрақты қалпына келу мүмкіндігін бағалады.
Өсімге не түрткі болды?
Bitcoin бағасының күрт өсуіне бірнеше фактор әсер етті. Солардың бірі – АҚШ Қазынашылығының ұзақ мерзімді мемлекеттік облигацияларды кері сатып алу көлемін күтпеген жерден екі есе арттыруы.
Бұл шешім 30 жылдық АҚШ қазынашылық облигацияларының кірістілігі 5,34%-ға жеткен кезеңде қабылданды. Нарық оны мемлекеттік қарыз нарығындағы қысымға жасалған реакция ретінде қабылдады.
Сонымен қатар АҚШ-тағы еңбек нарығына қатысты әлсіз деректер Федералдық резерв жүйесінің (ФРЖ) қатаң ақша-несие саясатын ұзақ уақыт жалғастыру мүмкіндігін шектеді.
Осының нәтижесінде облигациялар кірістілігі мен доллар тарапынан қысым әлсіреп, пайыздық табыс әкелмейтін активтерге, соның ішінде Bitcoin-ге деген қызығушылық артты.
Нарыққа нақты сұраныс қайта келді
Binance Research мәліметінше, Bitcoin ралли басталғанға дейін бірнеше ай бойы өзінің 200 күндік жылжымалы орташа көрсеткішінен төмен саудаланды. Ал спот-нарықтағы сауда көлемі көпжылдық минимумдарға жақындаған.
Алайда сұраныстың қайта жандануы бағаның өсуін күрт жылдамдатты.
Негізгі көрсеткіштер:
Bitcoin ETF-теріне $1,92 млрд қаражат құйылды. Бұл – соңғы 10 айдағы ең жоғары көрсеткіш;
$2,7 млрд көлеміндегі қысқа позициялар жойылды;
сұраныс спот және деривативтер нарығында бір уақытта күшейді. Бұл 2025 жылғы қазан айындағы шыңнан кейін алғаш рет байқалды.
Бұл жерде маңызды фактор – Bitcoin бағасының өсуі тек шорт-позициялардың жаппай жабылуына қатысты емес. Нарыққа жаңа сатып алушылардың нақты сұранысы да қайта оралған.
24,8%-дық апталық өсім
Binance Research есептеуінше, Bitcoin-нің бір аптадағы 24,8%-дық өсімі шамамен 2,5 стандартты ауытқуға тең. Мұндай қозғалыстар 2020 жылдан бері болған жағдайлардың шамамен ең үздік 1%-на кіреді.
Бұған дейінгі Bitcoin бағасының осындай жеті ірі апталық өсімін талдағанда, криптовалюта олардың барлығынан кейін бір ай өткен соң жоғары бағамен саудаланған.
Ал жеті жағдайдың алтауында Bitcoin екі айдан кейін де жоғары деңгейде болған. Осы кезеңдегі орташа өсім 18,3% құраған.
Дегенмен нарықтағы аюлы позициялардың едәуір бөлігі қазірдің өзінде жойылды. Сондықтан Bitcoin-нің әрі қарайғы қозғалысы жаңа шорттардың жабылуына емес, тұрақты спот-сұраныс пен ETF-тер арқылы келетін капиталға көбірек тәуелді болады.
Bitcoin үшін келесі маңызды факторлар қандай?
Binance Research Bitcoin бағасының мұндай жылдам өсуінен кейін құбылмалылықтың күшеюі мен түзетулер болуы мүмкін екенін жоққа шығармайды.
Алдағы кезеңде нарық үшін үш фактор маңызды болып қала береді:
жаһандық өтімділік;
нақты кірістілік деңгейі;
ФРЖ-ның ақша-несие саясаты.
Инвесторлар АҚШ еңбек нарығы мен инфляциясына қатысты жаңа деректерді, сондай-ақ ФРЖ-ның қыркүйектегі FOMC отырысы алдындағы сигналдарын мұқият бақылайды.
Bitcoin қазірдің өзінде шамамен $69 мың деңгейіндегі 200 күндік жылжымалы орташа көрсеткішінен жоғары көтерілді. Бұл криптовалютаның нарықтық құрылымы мен инвесторлардың көңіл-күйін жақсартатын фактор ретінде бағаланады.
Алайда кең ауқымды жаңа өсу циклі басталды деу үшін спот-нарықтағы сұраныстың сақталуы, өтімділіктің одан әрі ұлғаюы және нарықтағы қатысушылар белсенділігінің артуы қажет.
Bitcoin қор нарығынан қалып қойғанын қысқа уақытта өтеді
Bitcoin-нің тағы бір ерекшелігі – оның қор нарығымен салыстырғандағы динамикасынан байқалды.
Криптовалюта жылдың басым бөлігінде қор нарығынан қалып келгенімен, шамамен 72 сағат ішінде үш айға жуық салыстырмалы артта қалуын өтеді.
Бұл Bitcoin нарығының ерекшелігін тағы бір мәрте көрсетті: әлсіз динамика ұзақ уақытқа созылуы мүмкін, бірақ негізгі өсім бірнеше сауда күнінің ішінде шоғырланады.
Қазақстан үшін бұл нені білдіреді?
Цифрлық активтер нарығы біртіндеп реттелетін қаржылық инфрақұрылымның бөлігіне айналып келе жатқан Қазақстан үшін әлемдік криптонарықтағы мұндай қозғалыстардың маңызы зор.
Жаһандық өтімділік, Bitcoin-ге деген институционалдық сұраныс және ETF-терге капиталдың келуі жергілікті инвесторлардың көңіл-күйіне де әсер етуі мүмкін.
Сонымен бірге Bitcoin-нің бір апталық 24,8%-дық өсімі тұрақты бұқа нарығы басталды дегенді әлі білдірмейді. Binance Research бағалауынша, бұдан кейінгі кезеңде бағаның сақталуы ең алдымен нақты сатып алушылардың сұранысына және нарыққа жаңа капиталдың тұрақты келуіне байланысты болады.