Қаржы нарығын реттеу және дамыту агенттігі базалық банк лицензиясымен жұмыс істейтін банктерге қойылатын шектеулерді дайындап, жаңа қаулы шығарды.
Базалық лицензиямен жұмыс істейтін банктердің әр айдың соңғы жұмыс күніндегі активі 500 млрд теңгеден аспауы тиіс.
Бұл банктер үшін депозиттердің ең жоғары лимиті де енгізілді. Жеке тұлғалардың депозиттері Қазақстан кепілдік қорының ең жоғары кепілдік лимитінен аспайды. Жинақ депозиттері үшін бұл лимит 20 млн теңгеге дейін.
Әзірге ешбір банк базалық лицензиямен жұмыс істеп жатқан жоқ. Барлық банктер әмбебап лицензиямен жұмыс істеп жатыр.
Базалық лицензия банктерге депозиттерді қабылдауға, несие беруге және есеп айырысу-кассалық қызметтерді көрсетуге мүмкіндік береді. Дегенмен, оларға резидент еместерге немесе банкпен ерекше қарым-қатынасы бар клиенттерге несие беруге, күрделі қаржы құралдарымен операциялар жүргізуге немесе шетелдік активтерге инвестиция салуға рұқсат етілмейді.
Капиталы кемінде 10 млрд теңге (әмбебап лицензия үшін кемінде 20 млрд теңге) болатын қаржы институттары базалық лицензия алуға құқылы болады. Қазіргі уақытта Қазақстанда теориялық тұрғыдан базалық лицензиясы бар банктерге айналуы мүмкін 12 микроқаржы ұйымы жұмыс істейді.