Елде өзін-өзі жұмыспен қамтушыларға арналған рұқсат етілген тізім әзірленді. Оған барлығы 49 қызмет түрі енгізілген. Алайда «Атамекен» ұлттық кәсіпкерлер палатасы бұл тізімді 115 кәсіпке дейін кеңейтуді ұсынды.

Сенаттағы дөңгелек үстел барысында экономика вице-министрі Азамат Әмрин 2026 жылдан бастап Қазақстанда өзін-өзі жұмыспен қамтығандарға арналған арнайы салық режимі енгізілетінін хабарлады.

Бұл режимді қызметі рұқсат етілген тізімге кіретін тұлғалар пайдалана алады. Тізімге мал шаруашылығына көмек көрсету, музыкалық аспаптар жасау, такси қызметі, тамақ жеткізу, жалға беру, желілік маркетинг және түрлі жөндеу жұмыстары кіреді.

«Атамекен» ҰКП басқарма төрағасының орынбасары Тимур Жаркенов бұл тізіммен жұмыс істеуді жалғастырып, оны басқа қызмет түрлерімен толықтыру қажет екенін айтты.

«Біз бұл тізімді 115 қызмет түріне дейін кеңейтуді сұрадық. Ұсыныстар жіберілді. Қазір мұндай мамандықтар өте көп — адам өз қызметін өзі көрсететін кәсіптер. Мысалы, SMM-мамандары, таргетологтар. Жаңа қызмет түрлері өте көп. Белгілі бір қызметтерді “басқалары” ретінде біріктіру туралы алдын ала келісімдер бар. Бірақ қазір бұл тұжырымды нақтылап алу керек — мәселе экономика министрлігі мен Қаржы министрлігімен бірлесе шешілуде», — деді Тимур Жаркенов.

Ұлттық экономика министрлігі өкілдерінің айтуынша, өзін-өзі жұмыспен қамтушыларға қатысты палата ұсынған бірқатар ұсыныс заң жобасына енгізілген, ал қалғандары бойынша қосымша талқылау қажет.

Еске салайық, өзін-өзі жұмыспен қамтығандар жеке кәсіпкер ретінде тіркелуге міндетті емес. Олардың аударым мөлшерлемесі 4% (зейнетақы, медициналық және әлеуметтік сақтандыруға төлемдер, жеке табыс салығы төленбейді). Сонымен бірге өзін-өзі жұмыспен қамтушының жылдық табысы 15 миллион теңгеден аспауға тиіс және олардың жалдамалы қызметкерлері болмауы керек.