Бірер жылдың ішінде Қазақстан құс етін импортқа тәуелділіктен құтылып, оны экспорттаушы елге айналмақ. Осы мақсатта республикада құс фабрикаларын салу бойынша 30-дан астам жоба жүзеге асырылуда. Сенатта өткен парламенттік тыңдауда Премьер-Министрдің орынбасары Серік Жұманғарин осылай деді.

«31 құс фабрикасы салынып жатыр, үлкен жобалар бар. Бұл Алматы облысындағы Айтас, бірінші кезең – 120 мың тонна, екінші кезең – 120 мың тонна. Prima Kus – үшінші кезең жүріп жатыр. Жамбыл облысында «Алел Агро» жобалары бар. Бір сөзбен айтқанда, бір-екі жылдан кейін біз өзімізді-өзіміз қамтамасыз ететін емес, тауық етін сенімді экспорттаушы елге айналамыз деп болжамдаймыз», — деді Жұманғарин.

Оның айтуынша, қазіргі уақытта құс еті (73% жеткізу), шұжық өнімдері (60%), балық (54%), ірімшіктер мен сүзбе (57%), қант (42%) сияқты бірқатар тауарлар бойынша импортқа тәуелділік сақталуда.

Вице-премьер алдағы жылдары шұжық өнімдерінің импортына тәуелділікті азайтып, 2027-2028 жылдарға қарай өзін-өзі толық қамтамасыз етуге, сондай-ақ өнімді экспортқа шығару жоспарланып отырғанын айтты.

«Егер шұжық шығаратын болсақ, онда көптеген жобалар бар, демек ол айтарлықтай қымбат, бірақ өте сапалы. Шұжық үшін көршілеріміз басқа етті алып жатыр делік... Бұл Оңтүстік Америкадан, Бразилиядан, Аустралиядан келетін арзан ет, бұл сүт фермаларынан алынады», — деп түсіндірді Жұманғарин.

Ол қазіргі уақытта шұжық өнімдерінің қосымша өсімін қамтамасыз ететін бірнеше ірі жобалардың жүзеге асырылып жатқанын атап өтті.

Вице-премьер балық бойынша өзін-өзі қамтамасыз ету деңгейін шамамен 70-80 пайызға жеткізу жоспарланып отырғанын айтты.

«Біз қазір жүзеге асырылып жатқан барлық жобаларды қолдаймыз, бірақ балыққа қатысты жағдай өте қиын. Бізде белгілі бір тапшылық болғанымен, балық өнімдері көп сұранысқа ие емес. Қазір бір жобаны қарастырып жатырмыз. Атап айтқанда, қазір Құрықта үлкен жоба жүзеге асырылуда. Құрықпен айналысатын компания қызыл балық өндіру бойынша үлкен жоба әзірлемек», — деді Жұманғарин.