Қазақстан мен Өзбекстан өзара сауда айналымын $10 млрд жеткізуді көздейді.
Бұл туралы Қазақстан Премьер-Министрінің орынбасары Серік Жұманғарин 7 тамызда Астанада өткен «Қазақстан – Өзбекстан» бизнес форумын ашу барысында мәлімдеді.
«Өзбекстан 2023 жылдың қорытындысы бойынша 7-ші орында тұрған Қазақстанның ірі сауда серіктесінің бірі. Қазақстанның Орталық Азия елдерімен жалпы сауда айналымының 57%-дан астамы Өзбекстанға тиесілі. Соңғы 5 жылда екіжақты тауар айналымы 29%-ға өсіп, 2022 жылы $5 млрд көлеміне жетті. Бізге саудадағы мәселелерді жүйелі шешу және сауда айналымының жаңа өсу нүктелерін табу қажет, осылайша мемлекеттеріміздің басшылары қойған мақсат – орта мерзімді кезеңде $10 млрд-қа қол жеткізуге талпынуымыз керек», — деді Серік Жұманғарин.
Өзбекстан Премьер-министрінің орынбасары Джамшид Ходжаев мұндай іс-шаралар екіжақты ынтымақтастықты нығайтуға қуатты серпін беретінін атап өтті. Ол Қазақстан Өзбекстанның негізгі экономикалық серіктестерінің бірі екенін атап өтті.
«Әлемдік қауымдастық біздің өңірлерге біртұтас нарық призмасы арқылы қарайды. Сіздерді ірі жаһандық брендтерді тиімді тарту үшін күш-жігерімізді біріктіруге шақырамын», — деді ол.
Екі ел арасында өнеркәсіптік кооперация белсенді түрде дамып келеді, бұл $3,1 млрд сомасына 69 жоба, 14,7 мыңнан астам жұмыс орнын құруды көздейді. Қазірдің өзінде $217 млн сомасына 12 бірлескен жоба сәтті жүзеге асырылды, бұл тұрмыстық техника, жүк және жеңіл автокөліктер, тракторлар өндірісі. Белсенді фазада $178 млн астам сомаға үш инвестициялық жобаны іске асыру жүргізілуде. Олардың қатарында Тараз қаласындағы қуаты 500 мың тонна болат өнімін шығаратын электр металлургиялық зауыт пен Шымкент қаласында инфузиялық ерітінділерді өндіру бар.
Өзбекстан Қазақстанға жеміс-көкөніс өнімдерінің негізгі жеткізушісі саналады. Әлеуметтік маңызы бар агроөнеркәсіптік өнімдерді Өзбекстаннан жеткізуді дамыту үшін тез бұзылатын тауарларды тасымалдау кезінде «UZKAZTRADE» бірлескен кәсіпорнына қозғалыс басымдығын беру мүмкіндігі қарастырылатын болады.
Сонымен қатар, Серік Жұманғарин мен Өзбекстан Премьер-Министрінің орынбасары Жамшид Ходжаев $4,4 млрд сомасына 34 инвестициялық жобаны және $2,6 млрд-қа 7 сауда келісімін бірлесе жүзеге асыруға келісті. Келісімдер тиісті құжаттар тізімімен бекітілді.
Инвестициялық жобаларды энергетика, тау-кен өнеркәсібі және геология, көлік, химия өнеркәсібі, құрылыс, электротехника, машина жасау, фармацевтика және басқа да салаларда жүзеге асыру жоспарлануда. Ең көп жоба ауыл шаруашылығы саласында іске асырылмақ.
Тараптар ауыл шаруашылығы өнімдерін бірлесіп өсіру және Қазақстанда астық пен күрішті терең өңдеу, Түркістан облысында жібек өнімдерін өндіру, орау материалдарын шығаратын кәсіпорын құру және басқа да жобаларды жүзеге асыруға келісті. Сондай-ақ Маңғыстау облысы аумағында ІҚМ терілерін қабылдау және өңдеу бойынша бірлескен кәсіпорын құру туралы шешім қабылданды.
Аталған жобаларды жүзеге асыру екі елдің инвестициялық және сауда әлеуетін тиімді жүзеге асыруға мүмкіндік береді. Бұл Қазақстан мен Өзбекстан басшылары алға қойған – өзара сауда айналымын $10 млрд-қа дейін арттыру мақсатына жетуге жол ашады.