Ұлттық статистика бюросының хабарлауынша, 2025 жылы республиканың негізгі капиталына салынған инвестицияның жалпы көлемі 22,7 трлн теңгені құрады. 2024 жылмен салыстырғанда бұл көрсеткіш 13% өскен.

Инвестиция ең көп өскен өңірлер: Ақмола облысы — 53,1%; Павлодар облысы — 47%-ға; Жамбыл облысы — 38,8%; Ақтөбе облысы — 32,4%; Алматы облысы — 29,4%.

Ал Атырау (15,1% төмендеу) және Қарағанды (8,6% төмендеу) облыстарында көрсеткіш кері кеткен. Барлық капиталдық салымның тең жартысы ірі және орта кәсіпорындарға тиесілі. Шығындар құрылымында ғимараттарды салу мен күрделі жөндеу (66,1%), сондай-ақ машиналар мен жабдықтарды сатып алу (29,4%) басым.

Қаржыландыру көздері ретінде субъектілердің өз қаражаты басым болып тұр — 13,9 трлн теңге немесе жалпы көлемнің үштен екісі. Бюджет қаражатының үлесі 21,9%-ды құрады, бұл ретте мемлекет салған салымдар бір жылда 14,5% өскен. Ал банк секторы экономиканың нақты секторына салынған барлық инвестицияның тек 4,5%-ын ғана қамтамасыз етті.

Бұған қоса, шетелдік банктерден алынатын несиелердің үлесі екі еседен астам азайған: 2024 жылғы 1,1%-дан 2025 жылы 0,5%-ға дейін төмендеді. Резидент еместерден алынған қарыз қаражатының үлесі бір жылда 3,2%-дан 3,4%-ға дейін аздап өсті.

Салалар бойынша өнеркәсіп 39,8% үлеспен көш бастап тұр. Тау-кен секторына — 14,1%, ал өңдеу өнеркәсібіне — 12,3% қаражат салынды. Жылжымайтын мүлік операцияларына — 18%, көлік және қоймалау саласына — 17,8% тиесілі. Инвестиция құрылымында білім беру саласының үлесі 5,6%, ауыл шаруашылығынікі 5,1% болды.