Қазақстанда сиыр еті одан әрі қымбаттап барады, бірақ маусым айында өсу қарқыны 1,4%-ға дейін баяулады. Бұл – тұрақтандыру белгісі ретінде бағалануда, сыртқы сұраныстың жоғары деңгейде сақталуына қарамастан, деп хабарлады ҚР Сауда және интеграция министрлігінің баспасөз қызметі.

Үкіметте инфляция мәселелері бойынша өткен отырыста сиыр етіне бағаны ұзақ мерзімді тұрақтандыру мақсатында Ауыл шаруашылығы министрлігі кешенді шараларды жүзеге асырып жатқаны айтылды. Кәсіби түрде ІҚМ мен ҰҚМ бордақылаумен айналысатын кәсіпорындарға айналым қаражатын толықтыру бағдарламасы іске қосылды. Жылдық мөлшерлемесі 5% болатын жеңілдетілген несие арқылы асыл тұқымды аналық мал сатып алуға арналған тетік әзірленді.

«Бұдан бөлек, өңдеуші кәсіпорындарға әр сатылған килограмм сиыр етіне 175 теңге көлемінде субсидия беріледі», – деп хабарлады Сауда министрлігі.