2025 жылдың 11 айының қорытындысы бойынша елімізге құны 10,7 млн доллар болатын 3,8 мың тонна ет әкелінді. Бұл көрсеткіштер өткен жылдың сәйкес кезеңімен салыстырғанда тиісінше 100%-ға және 119% артық, деп жазады Data-Hub.

Тоннамен де, ақшамен де есептегендегі қазіргі көрсеткіштер кейінгі онжылдықтағы ең жоғары деңгейге жетті. Бұған дейінгі ең жоғары көрсеткіш — 2022 жылдың қаңтар-қарашасындағы деңгей болса, қазіргі көлем одан физикалық мәнде 12%, ақшалай номиналды түрде 17% жоғары.

Өткен жылы бізге ет жеткізген негізгі ел Моңғолия болды. Жалпы жеткізілім салмағының 60%-ы осы елге тиесілі, бұл ретте жылдық өсім 3,6 есе артқан. Айта кетерлігі, жалпы құрылымда Моңғолияның рөлі әрдайым мұндай жоғары бола бермейді. Соңғы он жылда оның үлесі тек бір рет — 2022 жылы ғана осыған ұқсас деңгейде болған еді.

Ал біздегі өндіріс жағдайы қалай? Оның көлемін сойылған малдың ет салмағы бойынша бағалауға болады. Алдын ала мәліметтер бойынша, 2025 жылдың қаңтар-қарашасында бұл көрсеткіш 146,8 мың тоннаны құрады, бұл 2024 жылдың осы кезеңімен салыстырғанда 5% көп. Демек, импорттың артуы ішкі тұтынудың жалпы азғантай өсімін көрсетіп отырған сияқты.

Экспортқа келетін болсақ, жылқы еті шетелге шығарылмайды. Мәселен, 2025 жылдың 11 айында шетелге небәрі 124 тонна ет сатылған, оның барлығы Өзбекстанға кеткен. Көріп отырғаныңыздай, бұл көрсеткіш импортпен салыстырғанда өте мардымсыз, бірақ соған қарамастан бұрынғы жылдармен салыстырғанда бұл — бұрын-соңды болмаған рекордтық деңгей.

Салыстыру үшін айтсақ, алдыңғы он жылда шетелге сатылған жылқы етінің жалпы көлемі бұдан екі есе төмен — небәрі 47,5 тонна болған. Оның өзі негізінен 2020 жылдың есебінен, ал басқа жылдары экспорт көрсеткіші көбіне нөлге жақын болады.