QAMS қауымдастығы Бас прокуратураға Самұрық-Қазына директорлар кеңесіне ЖИ енгізу шешімінің құқықтық салдарына қатысты ресми түсіндірме беру туралы сұрау жолдады. 

«QAMS Бас прокуратурадан төмендегі мәселелерді түсіндіруді сұрайды: Қазақстан заңнамасына сәйкес жасанды интеллект (ЖИ) жеке тұлға сияқты құқық субъектілігіне ие бола ала ма? Яғни ЖИ құқықтар мен міндеттерге ие бола ма? ЖИ-ды мұндай құқық субъектілігімен қайта қамтамасыз ету заңға емес, тек Үкімет қаулысына сүйене отырып мүмкін бе? ЖИ қатысқан жағдайда Самұрық-Қазына директорлар кеңесінің (ДК) қабылдаған шешімдері заңды күшін жоюға немесе жарамсыз деп танылуға негіз бола ма?», – делінген хабарламада.

Самұрық-Қазына қоры KASE биржасына тәуелсіз директор ретінде Samruk-Kazyna Artificial Intelligence (SKAI) жасанды интеллект енгізілгенін хабарлады. QAMS жолдаған сұрауға берген жауабында қор мұны жалғыз акционер — ҚР Үкіметінің шешімімен байланыстырған. Бұл шешім «Ұлттық әл-ауқат қоры туралы» заңның 8-бабының 1-тармағына негізделген. Алайда Самұрық-Қазынаның жауабында қойылған нақты құқықтық сұрақтарға тиісті жауаптар болмағандықтан, QAMS түсіндірме алу үшін Бас прокуратураға жүгінді.

«Бұл жағдай инвесторлар үшін Самұрық-Қазына директорлар кеңесінің шешімдерінің заңдылығына қатысты құқықтық белгісіздік туындатып; Азаматтық-құқықтық мәртебесі жоқ субъектінің қатысуымен қабылданған шешімдер мен мәмілелердің даулы болуы мүмкіндігін; Самұрық-Қазына мен оның портфельдік компанияларының болашақ бағалы қағаз ұстаушылары үшін реттеушілік және құқықтық тәуекелдердің артуын білдіреді», – делінген хабарламада. 

Айта кетсек, «Самұрық-Қазына» қоры 2 қазанда президент Қасым-Жомарт Тоқаевқа SKAI (Samruk-Kazyna Artificial Intelligence) нейрожелісін – Директорлар кеңесінің цифрлық тәуелсіз мүшесін таныстырған еді. SKAI - жасанды интеллект негізінде әзірленген және өңір бойынша Директорлар кеңесінің дауыс беру құқығы бар алғашқы цифрлық тәуелсіз мүшесі.