2025 жылдың алғашқы жартыжылдығында автонесие нарығы бөлшек сегменттің ең серпінді бағытына айналды. Банктер осы кезеңде жалпы құны 1,2 трлн теңгеге автонесие рәсімдеп, бұл көрсеткіш өткен жылмен салыстырғанда 53% көп болды.
Соның нәтижесінде автонесиелердің халыққа берілген жаңа қарыздардағы үлесі 8,8%-дан 13,2%-ға дейін өсті. Банк секторының жиынтық портфелінде де автонесиенің үлесі 15,4%-ға жетті.
Жартыжылдық соңында автонесиелер бойынша орташа сыйақы мөлшерлемесі 15,8%-ды құрады. Бұл өткен жылғы деңгейден (19,7%) айтарлықтай төмен. Сарапшылар мұны бәсекенің күшеюімен және акциялы өнімдердің көбеюімен байланыстырады.
Елдегі көлік бағасының 11,1% қымбаттауы аясында орташа автонесие көлемі 6,3 млн теңгеден 6,7 млн теңгеге өсті. Орташа айлық төлем 110,7 мың теңгені құрады, бұл былтырғыдан 8,1% аз.
Жыл басынан бері банктерге түскен өтінімдер саны 2,9 млн-ға жетті (+54%). Нәтижесінде несиеге алынған көліктердің үлесі 36%-дан 59%-ға дейін көтерілді.
Мерзімі өткен қарыздардың үлесі жылдың басындағы 2,8%-дан 3,4%-ға дейін өскен. Дегенмен бұл жалпы бөлшек несиелендірудегі орташа деңгейден (3,8%) төмен.
Қазақстанда шығарылған көліктердің үлесі де артты – бірінші жартыжылдықта өндіріс көлемі 62 мыңнан 69,8 мыңға дейін өсті. Осылайша, отандық көліктердің тіркелген жалпы автопарктегі үлесі 8%-ға жетті.
Сарапшылардың пікірінше, үшінші тоқсанда автонесиелерге деген жоғары сұраныс сақталады. Алайда банктердің ұстанымы әртүрлі болуы мүмкін: бір бөлігі пайыздық мөлшерлемелерді көтеруді, енді бірі – керісінше шарттарды жұмсартуды жоспарлап отыр.